Norska öryggislögreglan segir að mesta hættan af fjölgun flóttamanna í landinu sé sú að öfgasinnaðir þjóðernissinnar grípi til ofbeldis. Það sé miklu meiri ógn heldur hættan á að að öfgasinnaðir íslamistar laumi sér í raðir flóttafólks.
Þetta kemur fram í tilkynningu frá PST. Þar segir að PST hafi ekki áhyggjur af því að öfgasinnaðir íslamistar laumi sér inn í landið í skjóli hælisleitenda. Aukinn fjöldi hælisleitenda muni fyrst og fremst valda hættu vegna öfgasinnaðra þjóðernissinna í Noregi og hver viðbrögð þeirra verði.
Norðmenn hafa ekki enn jafnað sig á voðaverkum þjóðernisöfgasinnans Anders Behring Breivik sem drap 77 í júlí 2011. Ástæðan fyrir voðaverkinu var andstaða hans við fjölmenningarstefnu og það sem hann kallaði innrás múslíma.
Aldrei hefur verið gerð árás af hálfu öfgafullra íslamista í Noregi. Þar eins og víðar annars staðar hafa þjóðernissinnar látið í veðri vaka á samfélagsmiðlum að liðsmenn Ríkis íslams og annarra hryðjuverkasamtaka muni lauma sér inn í landið verði tekið á móti flóttafólki.
Mest hætta af þeim sem hafa tekið upp öfgaskoðanir í Noregi
Hættan sem stafar af öfgafullum íslamistum kemur fyrst og fremst frá fólki sem er fætt í Noregi eða hefur alist þar upp sem hefur tekið upp öfgaskoðanir í heimalandinu - Noregi, segir í tilkynningu PST.
Alls sóttu átta þúsund um hæli í Noregi á fyrstu átta mánuðum ársins. Fjórðungur þeirra eru Sýrlendingar. Gert er ráð fyrir að hælisleitendurnir verði alls 20 þúsund talsins í ár.