Ljón sem var aflífað fyrir níu mánuðum í dönskum dýragarði verður krufið í garðinum fyrir allra augum á fimmtudaginn í næstu viku. Mikla athygli vakti þegar heilbrigður gíraffi var aflífaður í dönskum dýragarði í febrúar á síðasta ári. Hann var krufinn og því næst fengu ljónin að gæða sér á hræi hans.
Að sögn Michaels Wallberg Sorensen, dýrahirðis í dýragarðinum í Óðinsvéum, telur starfsfólkið þar að lærdómsríkt sé fyrir gesti garðsins að fylgjast með krufningu ljóns og því hafi verið ákveðið að bjóða upp á þetta í garðinum. Dýrið var aflífað snemma á þessu ári þar sem of mörg ljón voru í garðinum og hefur það verið geymt í frysti síðan.
Í næstu viku fá grunnskólabörn í Danmörku frí í skólanum í nokkra daga og á dýragarðurinn von á fjölda fólks í heimsókn. Ætla má að þar verði börn í meirihluta og einhver þeirri verði vitni að krufningunni.
Gíraffinn Maríus var felldur í dýragarði í Kaupmannahöfn í febrúar á síðasta ári og mætti það mikilli gagnrýni.