Á hverjum degi koma sjö þúsund flóttamenn að landi á grísku eyjunum skammt frá Tyrklandi. Í síðasta mánuði var fjöldinn mun minni eða 4.500 manns á dag.
Þetta kemur fram í nýjum tölum frá Alþjóðstofnunar innflytjendamála, International Organization for Migration (IOM) en ótti við versnandi veður getur orðið til þess að flóttafólki á eftir að fjölga enn frekar á næstu vikum.
Í dag fóru um tuttugu Erítreumenn til Svíþjóðar frá Ítalíu en þeir eru fyrstu flóttamennirnir sem eru sendir til annars lands innan Evrópusambandsins í áætlun sem miðar að því að draga úr álaginu á Ítalíu og Grikkland en flestir flóttamenn koma að landi þar.
Á sama segjast Tyrkir vera hræddir um að enn fleiri Sýrlendingar eigi eftir að flýja yfir landamærin til Tyrklands vegna loftárása Rússa í Sýrlandi.
Talsmaður tyrkneska utanríkisráðuneytisins, Tanju Bilgic, varaði við þessu í dag en Tyrkir hafa þegar tekið við um tveimur milljónum sýrlenskra flóttamanna. Margir þeirra eru fullir örvæntingar þar sem þeim býðst að dvelja í yfirfullum flóttamannabúðum í Tyrklandi. Því reyna margir þeirra að forða sér yfir til Evrópusambandsríkjanna í leit að betra lífi.
Ástandið er einna verst á grísku eyjunni Lesbos en þar fjölgar flóttamönnum dag frá degi. En reynt er að afgreiða flesta þeirra eins hratt og hægt er og í síðustu viku voru 70% þeirra flóttamanna sem þangað komu farnir yfir til Makedóníu nánast samdægurs.
Í tilkynningu frá IOM kemur fram að Sýrlendingarnir fari hraðar frá eyjunni að landamærum Grikklands þar sem þeir hafi ráð á því. Þeir geta keypt miða með bátum til Aþenu og þaðan far með rútum að landamærunum. Aftur á móti eiga afganskir flóttamenn erfiðara með að útvega nægt fé til þess að kaupa miða með bátum og rútum.