Að minnsta kosti 37 létu lífið þegar að þrjár sprengjur sprungu í Tsjad í dag. Talið er að hryðjuverkasamtökin Boko Haram séu á bakvið árásirnar sem áttu sér allar stað í borginni Baga Sola sem stendur við Tsjad-vatn.
Að minnsta kosti 52 særðust í árásunum. Ein sprengjan sprakk á fiskmarkaði og hinar tvær í flóttamannabúðum í útjaðri borgarinnar.
Fyrir helgi var sagt frá því að Muhammadu Buhari, forseti Nígeríu, hafi gefið hershöfðingjum sínum þrjá mánuði til þess að stöðva Boko Haram en að minnsta kosti 17.000 manns hafa látið lífið í árásum þeirra frá árinu 2009.
Rúmlega 1.260 hafa látið lífið síðan hann tók við embætti 29. maí.