Allt að 50 þúsund íbúar Norður-Kóreu voru sendir úr landi þar sem þeir voru látnir starfa við aðstæður sem minntu helst á þrælabúðir. Þetta segir Marzuki Darusman, sem hefur rannsakað málið á vegum Sameinuðu þjóðanna. BBC greinir frá þessu.
Darusman segir að tekjur verkamannanna séu litlar sem engar, þeir fái lítið að borða og í einhverjum tilvikum eru þeir neyddir til þess að vinna 20 tíma á dag. Framlagið sem rennur til stjórnvalda í Norður-Kóreu er mun hærra heldur en það sem mennirnir fá sjálfir fyrir vinnuna, segir í skýrslu hans.
Flestir þeirra eru í Kína og Rússlandi þar sem þeir starfa við námavinnslu, textíliðnað og byggingaframkvæmdir.
En Darusman, sem fylgist með mannréttindamálum í Norður-Kóreu fyrir hönd SÞ, segir að verkamennirnir séu einnig í Asíu, Afríku, Miðausturlöndum og Evrópu. Hann segir að fyrirtæki sem ráði verkamenn frá Norður-Kóreu til sín séu þátttakendur í þrælahaldi.
Hann áætlar að yfirvöld í Norður-Kóreu fái á milli 1,2-2,3 milljarða Bandaríkjadala í laun fyrir mennina á ári.