Ummæli eins níu dómara hæstaréttar Bandaríkjanna við flutning máls sem varðar lögmæti sértækra aðgerða til að auka hlutfall minnihlutahópa í háskólum hafa verið túlkuð sem kynþáttafordómar. Á dómaranum mátti skilja að blökkumenn ættu ekki erindi í bestu háskóla landsins.
Hæstiréttur hlýddi á málflutning í máli sem kona sem synjað var um pláss við Texas-háskóla höfðaði gegn skólanum. Töldu lögmenn hennar að sértækar aðgerðir (e. affirmative action) sem kveða á um forgang blökkumanna og rómanskra nemanda stangast á við stjórnarskrá.
Antonin Scalia, einn íhaldssamasti hæstaréttardómarinn, sagði að þeir væru til sem héldu því fram að það hjálpi ekki blökkumönnum að komast inn í Háskólann í Texas þar sem þeim vegni ekki vel frekar en að koma þeim í ekki eins þróaðan skóla, skóla með hægari yfirverð þar sem þeim vegni vel.
„Í einu af álitunum [fyrir dómnum] er bent á að flestir svörtu vísindamenn landsins komi ekki frá skólum eins og Háskólanum í Texas. Þeir koma frá skólum þar sem þeim líður ekki eins og það sé verið að ýta þeim áfram í kúrsum sem fara of hratt fyrir þá,“ sagði Scalia.
Þessum orðum hans hefur tekið sem alhæfingu um námsgetu blökkumana. Harry Reid, leiðtogi demókrata í öldungadeild Bandaríkjaþings lýsti ummælum Scalia sem „rasisma“ á þingfundi í dag. Las hann ummælin upp í heild sinni og gagnrýndi dómarann harðlega.
„Þessar hugmyndir sem hann setti fram í gær eru rasískar í raun, ef ekki að yfirlögðu ráði. Ég veit ekki um ásetning hans en það er afar óhugnanlegt að heyra hæstaréttardómara styðja hugmyndir kynþáttahatara úr dómarasæti æðsta dómstóls landsins,“ sagði Reid.