Kofi Annan, fyrr­ver­andi aðal­rit­ara Sam­einuðu þjóðanna segist hafa áhyggjur af nýju lagafrumvarpi sem samþykkt var í Danmörku í dag sem heimilar yfirvöldum að gera fjármuni og hluti í fórum hælisleitenda upptæka fari verðmæti þeirra yfir 10.000 danskar krónur, jafnvirði um 190.000 kr

Annan lýsti yfir áhyggjum sínum á Facebook síðu sinni áður en frumvarpið var samþykkt og sagði það í andstæðu við danskar hefðir, sem einkennast yfirleitt af mannúð. Þar að auki segir hann frumvarpið sýna varhugaverða þróun í evrópskum stjórnmálum.

Að mati Annan ætti Evrópa að sameinast í því að styðja við flóttamenn en með frumvarpinu sé verið að fara í öfuga átt.

„Það að hóta að gera eigur flóttamanna upptækar og að fresta fjölskyldusameiningum um þrjú ár er ekki í anda Evrópusáttmálans um mannréttindi, Evrópusáttmálans um réttindi barna og Flóttamannasáttmálans,“ skrifaði Annan.

Skrifaði Annan jafnframt að Evrópusambandinu hafi mistekist að samþykkja sameiginlega stefnu í flóttamannamálum og hefur það leitt til „kapphlaups á botninn“ hjá aðildarríkjum sambandsins.

Talsmaður Flóttamannahjálpar Sameinuðu þjóðanna, Adrian Edwards, gagnrýndi frumvarpið einnig í dag og sagði að aðgerðirnar myndu valda erfiðleikum og skaða.

„Sú ákvörðun að veita danskri lögreglu leyfi til að leita í og gera verðmæti hælisleitanda upptæk sendir hættuleg skilaboð að okkar mati,“ sagði Edwards.

Svæðisstjóri Amnesty International, John Dalhuisen, tjáði sig um samþykkt frumvarpsins í dag og sagði hana illa innrætta.

„Þetta er sorgleg endurspeglun á hversu langt Danmörk hefur farið frá sínum sögulega stuðningi á alþjóðlegum venjum,“ sagði hann og nefndi Flóttamannasáttmálann í því samhengi.

Frétt BBC. 

Fyrri frétt mbl.is: Danir samþykkja umdeilt frumvarp

Kofi Annan er ekki ánægður með nýtt frumvarp danska þingsins. AFP

Tengdar fréttir

Flóttafólk í Skandinavíu

Andstaða við hugmyndir jafnaðarmanna

• Boða breytingar í flóttamannamálum
• Danir brutu gegn úrskurði Mannréttindadómstólsins
• Umtalsverð fækkun umsókna um vernd
• Börn í hættu í Svíþjóð

» Fleiri tengdar fréttir

• 1 blogg um fréttina

Bloggað um fréttina

• Þorsteinn Siglaugsson: Lágkúrulegt