Kröftugur jarðskjálfti af stærðinni 7,9 á Richter reið yfir Indónesíu, suðvestur af eyjunni Súmötru. Flóðbylgjuviðvörun hefur verið sett í gang, samkvæmt AFP-fréttastofunni.
Upptök skjálftans urðu á tíu kílómetra dýpi, nokkur hundruð kílómetrum frá borginni Padang á Súmötru.
Indónesía liggur á flekaskilum og því eru jarðskjálftar í landinu tíðir.
Blaðamaður AFP sem er á staðnum segir að íbúar í Padang hafi hlaupið út af heimilum sínum þangað sem land stóð hærra.
Töluverð ringulreið varð á götum borgarinnar vegna skjálftans. Litlar líkur eru samt taldar á manntjóni eða skemmdum á byggingum.
Árið 2004 varð mikill jarðskjálfti neðansjávar í Indlandshafi sem setti af stað flóðbylgju. Hún varð yfir 170 þúsund manns að bana í Indónesíu og tugum þúsundum til viðbótar í fleiri löndum í kringum Indlandshaf.