Ekkert samband er nú við norður-kóreskan kafbát sem talið er að sé staðsettur einhvers staðar í hafinu austur af Norður-Kóreu. Bandarískir embættismenn staðfesta þetta við fréttastofu CNN, en Bandaríkjaher hafði fylgst með ferðum kafbátsins undanfarna daga.
Á Kóreuskaga standa nú yfir umfangsmestu heræfingar til þessa þar sem bandarískar og suður-kóreskar hersveitir æfa hernaðaraðgerðir gegn ráðamönnum í Pyongyang. Alls eru við æfingar um 15.000 bandarískir hermenn og hátt í 300.000 manns úr röðum hersveita Suður-Kóreu.
Samhliða þessum æfingum hefur Bandaríkjaher einnig fylgst grannt með ferðum norður-kóresks kafbáts sem var á siglingu við austurströnd landsins. Er nú talið að ráðamenn í Pyongyang hafi misst allt samband við bátinn og að hann sé hættur siglingum.
Fylgjast gervitungl Bandaríkjahers, flugvélar og skip nú grannt með sjóher Norður-Kóreu sem sent hefur flota til leitar.
Ekki er vitað hvort kafbáturinn sé sokkinn eða einungis undir yfirborðinu, en talið er að áhöfn hans hafi glímt við einhvers konar bilun.