Loftárás var gerð á heilsugæslustöð í sýrlensku borginni Aleppo í morgun. Í fyrradag var gerð loftárás á sjúkrahús í borginni. Fimmtíu féllu í þeirri árás, m.a. læknar og sjúklingar.
Ekki er vitað hvort mannfall varð í loftárásinni í morgun en ljóst er að einhverjir særðust.
Sameinuðu þjóðirnar segja að ástandið í Aleppo sé orðið „hörmulegt“. Átök hafa harðnað síðustu daga. Árásirnar voru báðar gerðar í hverfi borgarinnar sem er undir yfirráðum uppreisnarhópa. Ekki er vitað hver bar ábyrgð á þeim.
Sjónarvottar segja að árásin á miðvikudag hafi verið gerð úr orrustuþotu. CNN hefur eftir samtökunum Læknum án landamæra, að fimmtíu hafi farist, þar af tveir læknar, tveir hjúkrunarfræðingar og einn öryggisvörður. Samtökin telja enn líklegt að tala látinna eigi eftir að hækka.
Læknar án landamæra og Rauði krossinn ráku spítalann í sameiningu.