Þremur mánuðum eftir að vefsíðan Europe’s Most Wanted Fugitives eða [e. Eftirlýstustu glæpamenn Evrópu], var sett í loftið með stuðningi Europol, er þegar búið að handsama tíu einstaklinga á listanum. Í a.m.k. sex tilfellum átti vefsíðan beinan þátt í handtökunni.
Það var í upphafi árs sem European Network of Fugitive Active Search Teams (ENFAST), samtök löggæslusveita innan Evrópusambandsins sem leita uppi einstaklinga sem eru á flótta undan réttvísinni, komu vefsíðunni www.eumostwanted.eu í loftið. Þar getur almenningur aðstoðað lögreglu við að hafa uppi á þeim einstaklingum sem eru efst á lista löggæslustofnanna í ESB ríkjum yfir einstaklinga á flótta undan réttvísinni.
ENFAST eru samtök lögreglumanna í ESB og nágrannaríkjum sem sérhæfa sig í að hafa uppi á og handsama flóttamenn. Handtökum á vegum ENFAST hefur fjölgað verulega á undanförnum árum, en 42 voru handteknir árið 2011 á móti 239 í fyrra.
Á vefsíðunni er að finna upplýsingar um þekkta glæpamenn sem hafa hlotið dóm, eða sem eru grunaðir um alvarlega glæpi eða hryðjuverk í Evrópu.
Íbúar ESB og annarra ríkja geta veit gagnlegar upplýsingar í gegnum vefsíðuna og jafnvel sleppt því að gefa upp nafn sitt ef þeir svo kjósa. ENFAST hefur notið stuðnings Europol við verkefnið, m.a. við hönnun á öruggum gagnagrunni fyrir vefsíðuna.
Sex þeirra tíu sem þegar eru komnir bak við lás og slá, voru handsamaðir í kjölfar upplýsinga frá almenningi eða vegna aukinnar fjölmiðlaathygli.
„Europe’s Most Wanted Fugitives listinn veitir ENFAST nýtt og mikilvægt tæki til að komast að því hvar glæpamenn eru niðurkomnir,“ segir í fréttatilkynningu frá Europol. „Vefsíðan gerir íbúa ESB að þátttakendum í leitinni að glæpamönnum á flótta undan réttvísinni og dregur þannig úr líkum á að þeim takist að fara huldu höfði. Árangur af „Europe’s Most Wanted Fugitives“ vefsíðunni á þessum fyrstu þremur mánuðum fer fram úr okkar björtustu vonum.“
Sex af þeim tíu einstaklingum sem þegar hafa verið handteknir, voru gripnir í öðru ríki en þar sem þeirra var upprunalega leitað og segir Rob Wainwright, forstjóri Europol, stofnunina vera þakkláta fyrir þann mikla stuðning sem almenningur hefur sýnt verkefninu.