Spennuþrungin ró er sögð ríkja í sýrlensku borginni Aleppo eftir að vopnahlé, sem nær til hluta borgarinnar, tók gildi. Íbúar eru sagðir hafa farið út fyrir hússins dyr í fyrsta sinn í tvo sólarhringa, en vopnahléið tók gildi í morgun.
Þetta kemur fram á vef BBC. Þar segir ennfremur, að það komi fram í sýrlenskum ríkisfjölmiðlum og frá eftirlitshópum að einn hafi látist í borginni í kjölfar árása uppreisnarmanna í nótt.
Bardagar í Aleppo hafa ógnað vonum manna um að koma á friði í landinu, en vonast er til að hægt sé að fá stríðandi fylkingar til að leggja niður vopnin og hefja formlegar friðarviðræður.
Undanfarnar tvær vikur hafa hátt í 300 fallið í bardögum stjórnarhermanna og uppreisnarmanna í Aleppo.
Sýrlenska ríkissjónvarpið lýsti því yfir að herinn hafi ákveðið að vopnahléið myndi taka gildi klukkan eitt í nótt að staðartíma (klukkan 22 í gærkvöldi að íslenskum tíma).
John Kerry, utanríkisráðherra Bandaríkjanna, sem átti þátt í að miðla málum í samskiptum við Rússa og Sameinuðu þjóðirnar og koma á vopnahléi, hvatti allar fylkingar til að standa við samkomulagið.
Þá hvatti Kerry uppreisnarmenn til að halda sig frá al-Nusra, hreyfingu íslamista sem tengjast al-Qaeda, sem og liðsmönnum Ríkis íslams, en vopnahléið tekur ekki til þessara samtaka í vopnahléssamkomulaginu.