Christine Lagarde, framkvæmdastjóri Alþjóðagjaldeyrissjóðsins, hefur hótað því að annað hvort komist leiðtogar erlendra lánadrottna Grikklands að samkomulagi um endurskipulagningu skulda ríkisins eða sjóðurinn dregur til baka þátttöku sína í björgunaraðgerðum.

Þetta kemur fram í erindi sem lekið var til fjölmiðla en þar segir m.a. að aðkoma AGS sé háð því að aðstoð evrópskra bandamanna Grikkja byggi á raunverulegum markmiðum, byggðum á trúverðugum aðgerðum.

Sex ár eru liðin frá því að gríska ríkið fékk fyrstu lánveitinguna byggða á björgunarpakka, sem hefur náð 240 milljörðum evra að stærð. Viðræður milli stjórnvalda og lánadrottan landsins hafa m.a. strandað á efnahagslegum markmiðum, en Lagarde hefur lagt áherslu á að lánadrottnar dragi úr kröfum sínum um rekstrarafgang.

Stjórnvöld í Grikklandi tikynntu nýverið atkvæðagreiðslu um óvinsælar breytingar á lífeyris- og skattalögum. Boðað hefur verið til mótmæla af þessu tilefni.

Grikkir standa enn og aftur frammi fyrir þjóðargjaldþroti ef þeim tekst ekki að greiða af lánum sem eru á gjalddaga í júlí nk.

Ítarlega frétt um málið má lesa hjá Guardian.

Tengdar fréttir

Grikkland

Ferðamönnum boðið frítt til Grikklands

• Grikkir ganga til kosninga
• Sprengjutilræði í Aþenu
• Efnahagsaðstoð við Grikki lokið
• Ekkert samkomulag um afskriftir

» Fleiri tengdar fréttir

• Blogga um frétt