Bannað að grínast með þjóðsönginn

Hæstiréttur Rússlands hefur greitt götu lagafrumvarps sem felur í sér að einstaklingar sem hæðast að þjóðsöng landsins gætu þurft að sæta fangelsisvist í allt að eitt ár. Með nýjum lögum bætist þjóðsöngurinn í hóp með þjóðfána landsins og skjaldarmerki sem nú þegar er saknæmt að hæðast að skv. rússneskum lögum.

Frá þessu er greint á vef BBC en þar segir að þeir sem „viljandi afskræma textann eða sönginn opinberlega, á samfélagsmiðlum eða á netinu“ gætu þurft að dúsa í fangelsi í allt að eitt ár. Í dag er þó óheimilt að hæðast að laginu og eiga þeir sem gera grín að laginu í hættu á að vera sektaðir á bilinu frá rúmlega 5 þúsund krónum upp í tæplega 300 þúsund (45 til 2.200 bandaríkjadalir).

Neyðarlegt atvik á Krímskaganum

Stjórnarþingmennirnir tveir sem flytja frumvarpið segja að hvatningin að baki lagabreytingunni sé neyðarlegt atvik sem kom upp 8. apríl sl. í Sebastopol á Krímskaga. Kalla þeir atvikið skandal en háðsútgáfa var spiluð af laginu á ríkisstjórnarfundi sem haldinn var á svæðinu. Samkvæmt upplýsingum frá lögreglu áttaði sá sem spilaði myndbandið sig ekki á því að um væri að ræða háðsútgáfu af laginu en lagið hafði hann fundið á netinu.

„Hugsið ykkur þessar aðstæður,“ sagði Vladimir Tyunin, embættismaður í innanríkisráðuneytinu. „Borgarstjórinn rís á fætur og á skjánum á bak við hann er þetta efni,“ hélt hann áfram í samtali við rússneska fjölmiðla. Í textanum var Rússlandi lýst sem klikkuðu, þrælslegu og montnu.

• Blogga um frétt