Virt öryggisfyrirtæki rannsakar nú hvort stjórnvöld í Norður-Kóreu tengjast gagnaárásum sem gerðar hafa verið á nokkra banka á undanförnum mánuðum.

Forsvarsmenn fyrirtækisins, Symantec, sögðust í yfirlýsingu hafa undir höndum vísbendingu um að sami hópur tölvuþrjóta hefði gert tilraun til að ræna banka í Filippseyjum og Víetnam og jafnframt seðlabanka Bangladess.

Þá væri forritið sem tölvuþrjótarnir notuðust við svipað því sem notað var í árásinni á tölvukerfi kvikmyndadeildar Sony í nóvember 2014. Bandarísk stjórnvöld segja að Norður-Kóreumenn hafi verið á bak við árásina.

Eins og kunnugt er var um áttatíu og einni milljón Bandaríkjadala stolið frá seðlabankanum í Bangladess í febrúar á þessu ári. Tengsl virðast vera milli ránsins og tölvuárásarinnar á Sony, að mati fyrirtækisins BAE Systems, sem starfar meðal annars á sviði tölvuöryggis, eftir því sem fram kemur í frétt Reuters.

Svo virðist sem tölvuþrjótunum hafi tekist að brjóta sér leið í gegnum varnir bankanna, komist þannig yfir notendaupplýsingar og gefið út tilskipanir um að millifæra ætti stórfé.

Tengdar fréttir

Norður-Kórea

Skutu langdrægu flugskeyti á loft

• Zhao heimsækir Norður-Kóreu
• Segir Kishida vilja funda með Kim Jong-un
• 12 ára þrælkunarvinna fyrir sjónvarpsgláp
• Heræfing nærri suðurkóreskri lögsögu

» Fleiri tengdar fréttir

• Blogga um frétt