Vitur stjórnmálamaður og forsetaframbjóðandi með framtíðarsýn. Svona er Donald Trump, forsetaframbjóðanda repúblikana, lýst í ritstjórnargrein í norðurkóreska dagblaðinu DPRK Today, í dag. Fjölmiðillinn, sem er ríkisrekinn, er opinber miðill ríkisins.
Var það stefna Trump gagnvart Asíu sem heillaði höfund greinarinnar, fræðimann að nafni Han Yong Mook. „Trump sagði að hann myndi ekki taka þátt í stríðinu á milli suðursins og norðursins,“ sagði í greininni. „Er þetta ekki heppilegt frá sjónarhorni Norður-Kóreumanna?“
Þá sagði Mook að „margar jákvæðar hliðar“ séu á málflutningi Trump, en auk þess kallaði hann Hillary Clinton „sljóa” og „bitlausa.”
Aidan Foster-Carter, prófessor við háskólann í Leeds, sagði í samtali við fréttastofuna NK News að það væri „mjög sláandi“ að opinber miðill Norður-Kóreu skyldi birta slíka grein. Þrátt fyrir að með greininni væri ríkisstjórnin ekki beint að tjá sig, væri verið að senda ákveðin skilaboð.
Trump sagði nýlega að hann væri viljugur til að hitta Kim Jong-un, leiðtoga Norður-Kóreu, til að ræða kjarnorkuáætlun Asíuríkisins. Slíkur fundur myndi marka stórfellda breytingu í stefnu Bandaríkjanna gagnvart Norður-Kóreu.
Norður-Kórea gerði fyrstu tilraunir sínar með kjarnorkuvopn árið 2006, þvert gegn alþjóðasáttmálum og hefur endurtekið hótað Suður-Kóreu og Bandaríkjunum kjarnorkuárásum. Í síðasta mánuði sagði Trump að Bandaríkin ættu að hætta að koma í veg fyrir að bandamenn þeirra, Japan og Suður-Kórea, eignuðust kjarnorkuvopn en sú yfirlýsing er hrópandi mótsögn við langvarandi stefnu Bandaríkjanna gegn útbreiðslu kjarnavopna. Í viðtali Reuters kallaði Trump einnig eftir því að samið yrði um Parísarsáttmálann, þar sem yfir 170 lönd hétu því að minnka losun kolefna, á ný.