Evrópusambandið varaði í dag pólsku ríkisstjórnina við afleiðingunum dragi hún ekki til baka breytingar á stjórnlagadómstól landsins og fjarlægi „kerfislæga ógn“ við réttarríkið. Pólverjar gætu átt á hættu að missa atkvæðisrétt í ráðherraráði sambandsins.
Viðræður hafa staðið á milli fulltrúa ESB og pólsku stjórnarinnar undanfarna mánuði en Frans Timmermanns, varaforseti framkvæmdastjórnar sambandsins, segir að engin lausn hafi fundist á þeim málum sem valda leiðtogum sambandsins mestum áhyggjum.
„Við höfum ákveðið að senda pólskum yfirvöldum álit á réttarríkinu,“ segir Timmermans.
Pólskum stjórnvöldum þykir þó lítið til álitsins koma. Konrad Szymanski, aðstoðarutanríkisráðherra landsins, segir ekkert nýtt að finna í því þar sem ríkisstjórnin hafi átt von á álitinu.
Eftir að hægriflokkurinn Lög og réttlæti fór með sigur af hólmi í þingkosningum í Póllandi seint á síðasta ári hefur pólitísk upplausn ríkt þar. Nýja stjórnin dreif í gegn breytingar á ákvarðanatökuferli stjórnlagadómstóls Póllands sem eru sagðar hafa lamað störf hans.
Í kjölfarið hóf ESB rannsókn á því hvort að breytingarnar samræmdust reglum þess um lýðræði og hvort rétt væri að beita refsiaðgerðum.
Timmermans minntist ekki beinum orðum á refsiaðgerðir gegn Póllandi en þær eru síðasta úrræði sambandsins. Þeim hefur aldrei verið beitt gegn aðildarríki ESB og líklegt er að Ungverjar, sem eru bandamenn Pólverja, myndu koma í veg fyrir að þeim yrði beitt í þessu tilfelli. Samþykki allra aðildarríkjanna þarf fyrir refsiaðgerðum.
Pólska stjórnin hefur tvær vikur til þess að bregðast við áliti ESB.