Taldir hafa njósnað um lögreglumenn

Þrír menn sem taldir eru tengjast Larossi Abballa, sem drap tvo lögreglumenn fyrir framan barn þeirra í úthverfi Parísar fyrr í mánuðinum, voru handteknir í dag. Eru þeir grunaðir um að hafa njósnað um aðra lögreglumenn.

Mennirnir voru handteknir í úthverfum Parísar, Mureaux og Mantes-la-Jolie, en þar bjó einmitt Abballa sem var skotinn til bana af lögreglu eftir að hann drap parið á heimili þeirra 13. júní síðastliðinn. Einn af þeim sem var handtekinn í dag er á lista franskra yfirvalda yfir grunaða hryðjuverkamenn.

Mennirnir eru grunaðir hafa njósnað um fólk á viðburði lögreglumanna í héraðinu Yvelines, vestan við París. Er núna verið að skoða hvort þeir tengist á einhvern hátt drápunum á Jean-Baptiste Salvaing og Jessica Schneider á heimili þeirra í Magnanville, einnig í Yvelines.

Abballa drap Salvaign áður en hann tók Schneider í gíslingu og skar hana á háls. Þriggja ára sonur parsins var á heimilinu en slapp ómeiddur fyrir utan andlegt áfall. Árásarmaðurinn birti myndband í beinni á Facebook innan úr húsinu, lýsti yfir hollustu við Ríki íslams og hvatti aðra liðsmenn til þess að halda blóðbaðinu áfram.

Fyrri frétt mbl.is: Var hliðhollur Ríki íslams

Jean-Baptiste Salvaing og Jessica Schneider voru myrt af Abballa. AFP

• Blogga um frétt