Barack Obama Bandaríkjaforseti hefur lýst yfir hamfaraástandi í Vestur-Virginíu þar sem stærstu flóð ríkisins í hálfa öld hafa kostað í það minnsta 24 einstaklinga lífið.
Obama hefur skipað fyrir um að þær þrjár sýslur sem hafa orðið hvað verst fyrir barðinu á flóðunum fái styrki frá alríkisstjórninni fyrir tímabundnu húsnæði, sjúkrakostnaði og viðgerðum. Yfir 30.000 heimili og fyrirtæki eru rafmagnslaus.
Mikil rigning á fimmtudag breytti ám og lækjum í mikinn vatnsflaum sem lokaði á rafmagn til margra bæja. Hundruðum manna hefur verið bjargað af heimilum sínum vegna vatnsflaumsins. Rigning fimmtudagsins samsvaraði fjórðungi af þeirri rigningu sem yfirleitt fellur í Vestur-Virginíu á ári hverju.
Yfir 100 heimili eru gjöreyðilögð og voru sum þeirra rifin upp af undirstöðum sínum. Björgunarmenn björguðu fólki í gegnum glugga á efri hæðum húsa, af trjátoppum og þökum bíla. Meðal þeirra sem bjargað var er 97 ára kona og fimm manna fjölskylda, þar af eitt kornabarn. Um 500 manns sátu fastir í verslunarmiðstöð á meðan björgunarsveitir börðust við að byggja nýja malarvegi til að ná til þeirra. Lýst hefur verið yfir neyðarástandi í 44 sýslum af 55 í ríkinu og um 500 hermenn hafa verið kallaðir út til að aðstoða við björgunaraðgerðir.