Nigel Farage, leiðtogi breska sjálfstæðisflokksins og einn helsti talsmaður þess að Bretar yfirgefi Evrópusambandið, segir að þingmenn Evrópuþingsins hafi verið dónalegir við sig þegar hann tók til máls í umræðum í þinginu í morgun.
Þeir hafi hrópað hann niður og kallað ókvæðisorð að honum. Þess vegna hafi hann ákveðið að ögra þeim aðeins.
Til umræðu á Evrópuþinginu var yfirvofandi brotthvarf Breta úr Evrópusambandinu. Púað var á Farage þegar hann tók til máls og einnig voru hróp gerð að Jean-Claude Juncker, forseta framkvæmdastjórnar Evrópusambandsins.
Farage gagnrýndi þingmennina harðlega og sagði þá vera í algjörri afneitun. Þeir hefðu aldrei unnið almennilega vinnu á ævinni.
„Þegar ég kom hingað fyrst fyrir sautján árum sagði ég við ykkur að ég ætlaði að koma Bretum úr Evrópusambandinu. Þið hlóguð að mér. Þið hlæið ekki núna,“ sagði Farage í ræðu sinni.
Í samtali við Channel News 4 í kvöld sagði Farage að „vaxandi spenna“ væri í Bretlandi um þessar mundir. „Við munum verða land sem er opið og velkomið. Munurinn er hins vegar sá, vegna Brexit, að við getum nú stjórnað fjöldanum,“ sagði hann.
Frétt mbl.is: Evrópuþingmenn gagnrýndu úrsögnina