Að minnsta kosti fjórtán létu lífið í Pakistan í dag þegar flóðvatn hrifsaði með sér bifreið sem flutti brúðkaupsgesti. Flestir hinna látnu eru konur og börn.
Yfir tuttugu voru í bílnum, sem verið var að aka á fjallvegi í bænum Khyber, þegar atvikið átti sér stað. Leit stendur nú yfir að fleirum sem voru í bílnum en að sögn talsmanns lögreglunnar er erfitt að leita á svæðinu. Þá er nákvæmur fjöldi farþega ekki ljós.
Gríðarlega mikið hefur rignt á svæðinu í þessum mánuði og hefur töluvert verið um flóð. Mikið er um flóð í Pakistan á monsúntímabilinu, sem stendur yfir frá júní og fram í september, og farast hundruð manna í slíkum flóðum ár hvert.