Rúmlega 70 áhrifamiklir einstaklingar í Repúblikanaflokknum hafa ritað nafn sitt við bréf þar sem þeir hvetja flokkinn til að hætta að eyða fé í kosningabaráttu Donalds Trumps. Fénu væri betur varið í kosningabaráttu vegna þingkosninganna í nóvember.
„Við teljum að sundurlyndisandi, ófyrirleitni, vanhæfni og fordæmalausar óvinsældir Donald Trump feli í sér þá áhættu að Demókrataflokkurinn hafi afgerandi sigur í þessum kosningum,“ segir í drögum að bréfinu sem ætlað er formanni landsnefndar Repúblikanaflokksins, Reince Priebus.
Dagblaðið Politico hefur eintak af bréfinu, en þar er kallað eftir „tafarlausum breytingum“ á styrkveitingum flokksins og að fjármunum verði eytt í kosningabaráttu vegna þingkosninganna, til að styðja við þá frambjóðendur flokksins sem þegar hafi borið skaða af framboði Trumps.
„Þetta ætti ekki að vera erfið ákvörðun, þar sem möguleikar Donalds Trumps á að verða kjörinn forseti fara minnkandi með degi hverjum,“ segir í bréfinu. Trump hafi gert milljónir kjósenda allra flokka afhuga sér með orðræðu sinni og gjörðum. „Þessi nýlegu hneykslismál hafa tengst kosningabaráttu hans sem byggist á reiði og útilokun. Hann hefur hætt og móðgað milljónir kjósenda, m.a. fatlaða, konur, múslima, innflytjendur og minnihlutahópa.“
Politico segir að í bréfinu komi einnig fram að Trump hafi sýnt hættulega einræðistilburði, „m.a. með hótunum um að banna heilu trúarbrögðunum inngöngu í landið, að skipa hernum að brjóta lög með því að pynta fanga, að drepa fjölskyldur grunaðra hryðjuverkamanna, nota gagnagrunn til að fylgjast með löghlýðnum múslimum og að nota forsetatilskipanir til að koma í gegn öðrum ólöglegum og óstjórnarskrárvörðum málum.
Fjöldi mikilsmetinna repúblikana hefur þegar undirritað bréfið, en að sögn Politico tók það að ganga milli valinna einstaklinga í flokknum í þessari viku og er gert ráð fyrir að það verði sent Priebus í næstu viku.