Eiturlyf eru talin skýra veikindi meðal heimilislausra í einu hverfi Los Angeles en tugir hafa þurft að leita á bráðamóttökur undanfarna daga.
Um er að ræða eiturlyf sem ekki er ólöglegt hér á landi né heldur í Svíþjóð en þar hefur það kostað nokkur mannslíf. Lyfið nefnist spice en við framleiðslu á spice og öðrum skyldum efnum er oft verksmiðjuframleiddum efnum sprautað yfir jurtir, reykelsi eða sambærilega hluti til þess að líkja eftir áhrifum af THC (virka efninu í kannabis). Þetta dóp kom fyrst á markað í Bandaríkjunum árið 2008 og gengur yfirleitt undir heitinu spice eða K2 þó svo að nöfnin séu fjölmörg. Það var gjarnan markaðssett sem reykelsi og selt í litlum litríkum pakkningum og tekið fram að ekki skyldi innbyrða það.
Spice eða K2 varð strax afar vinsælt meðal bandarískra menntaskólanema og annarra ungmenna þar sem það var löglegt og hægt að kaupa það í verslunum og á netinu allt þar til í júlí 2012 er Barack Obama, forseti Bandaríkjanna, skrifaði undir lög sem lögðu bann við sölu á gervikannabisefnum (synthetic cannabinoids).
Frétt mbl.is: Löglegt en banvænt
Átján manns úr Skid Row-hverfinu þurftu á aðstoð slökkviliðsmanna að halda í gær og voru 14 fluttir á sjúkrahús. Á föstudag þurfti að veita um 50 manns aðstoð og enduðu 38 þá á sjúkrahúsi.
Þrátt fyrir að það hafi ekki verið formlega staðfest með eiturefnarannsókn hver ástæðan er fyrir veikindunum er talið nánast fullvíst að spice sé ástæðan.
Vegna þess að um tilbúið efni er að ræða er ekki vitað nákvæmlega hvert virka efnið er og styrkleikinn er misjafn, segir Marc Eckstein, framkvæmdastjóri lækninga hjá slökkviliðinu í Los Angeles.
Um fimm þúsund eru heimilislausir í Skid Row-hverfinu í Los Angeles og glíma margir þeirra við andleg veikindi og fíkn. Flestir þeirra sofa á götum úti enda neyðarskýli af skornum skammti.