Ferðamönnum hefur fækkað um sjö prósent í Frakklandi síðan í janúar. Ástæðurnar kunna að vera nokkrar að sögn utanríkisráðherra landsins, Jean-Marc Ayrault, m.a. hryðjuverkaógn, verkföll og slæmt veður.
„Komum ferðamanna hefur fækkað um sjö prósent síðan í ársbyrjun,“ sagði Ayrault en hann er einnig ferðamálaráðherra landsins. Sagði hann samdrátt í ferðamannaiðnaðinum ná til alls landsins en París hafi orðið verst úti.
Frakkland er vinsælasti áfangastaður ferðamanna í heimi en árið 2015 sóttu tæplega 85 milljónir landið heim. Næst á eftir komu Bandaríkin með 77,5 milljónir ferðamanna. Hlutfall ferðaþjónustu af vergri landsframleiðslu Frakklands er um það bil níu prósent.
„Hryðjuverkaárásirnar eru að hluta til ábyrgar fyrir þessari svekkjandi sveiflu. Óttinn við frekari árásir hefur áhrif á einhverja ferðamenn, sérstaklega þá ríkari eða frá Asíu,“ sagði Ayrault og bætti við að efnahagsörðugleikar í Rússlandi og Brasilíu hefðu einnig áhrif á fjöldann sem þaðan kæmi.
Sagði hann að flóðin úr Signu og verkföllin í fluggeiranum hefðu vissulega haft sitt að segja líka. Fjöldi gistinátta í París dróst saman um 11,4 prósent síðan í janúar og er áætlað tap vegna fækkunarinnar um einn milljarður evra. Japönskum túristum í landinu fækkaði um 46,2 prósent á Parísarsvæðinu, Rússum fækkaði um 35 prósent og Ítölum um 27 prósent.