Um 1.500 Bandaríkjamenn tóku óvænt stefnuna inn fyrir kanadíska landhelgi þegar þeir réðu ekkert við báta sína og fleka í miklu roki á árlegum viðburði sem nefnist Port Huron Float Down. Þessi óvænta innrás á sunnudag varð þó ekki kveikjan að milliríkjadeilu heldur fengu allir fylgd aftur yfir landamærin.
Viðburðurinn fer fram á ánni St. Clair sem aðskilur Michigan-ríki Bandaríkjanna og Kanada, en þá lætur fólk sig fljóta, m.a. á flekum eða litlum plastbátum, eftir ánni. Ferðin hefst við Lighthouse-ströndina við Port Huron í Michigan og er áfangastaðurinn Chrysler-ströndin í Marysville. Kári var hins vegar í jötunmóð og blés 1.500 Bandaríkjamönnum yfir til nágranna sinna í norðri.
Fram kemur á vef breska ríkisútvarpsins að það hafi tekið margar klukkustundir að flytja fólkið aftur til Bandaríkjanna, að því er haft eftir lögreglunni í Sarnia í Ontario-fylki. Engan sakaði og enginn var hnepptur í varðhald vegna málsins.
Lögreglan segir að margir hafi verið vanbúnir, t.d. ekki í neinum björgunarvestum.
„Þetta var algjör martröð, en við komust í gegnum þetta,“ er haft eftir Scott Clarke hjá lögreglunni í Sarniu. „Það var löng bið og langar raðir. Fólkið var blautt og því var kalt, en allir komust á endanum heim.“
Það tók um sex klukkustundir að koma fólkinu að landamærum Bandaríkjanna, en fólkið var flutt í 19 rútum. Þá fylgdi töluvert drasl með bandaríska „innrásarliðinu“, en bjórdósir, kælibox og borð voru á meðal þeirra muna sem skolaði á kanadísku strandlengjuna.
Fram kemur á vef BBC, að bandaríska strandgæslan hafi gert tilraun til að starfa með skipuleggjendum viðburðarins en það hefur ekki gengið upp þar sem enginn hefur viljað gerast ábyrgðarmaður hátíðarinnar.