Joe Biden, varaforseti Bandaríkjanna, kom til Tyrklands í morgun til viðræðna við stjórnvöld þar í landi. Á sama tíma hófu Tyrkir hernaðaraðgerðir gegn Ríki íslams í bænum Jarabulus í Sýrlandi.
Frétt mbl.is: Stórsókn á Ríki íslams
Biden er hæst setti vestræni embættismaðurinn sem heimsækir Tyrkland síðan misheppnuð valdaránstilraun var gerð í landinu 15. júlí.
Varaforsetinn ætlar sér að styrkja tengsl Bandaríkjanna við Tyrkland eftir tilraunina. Stjórnvöld í Ankara telja að klerkurinn Fethullah Gulen, sem er búsettur í Pennsylvaníu í Bandaríkjunum, hafi staðið á bak við hana.
Tyrkir hafa ítrekað óskað eftir því að Bandaríkjamenn framselji Gulen en hann hefur ítrekað neitað því að hafa staðið á bak við valdaránstilraunina.
Stjórnvöld í Bandaríkjunum staðfestu í gær að Tyrkir hefðu formlega óskað eftir framsalinu. Gulen hefur verið í sjálfskipaðri útlegð í Bandaríkjunum frá árinu 1999.
Frétt mbl.is: Bandarískir embættismenn til Tyrklands