Erlent | AFP | 19.9.2016 | 15:33 | Uppfært 16:08

Rahami handtekinn eftir skotbardaga

Frá vettvangi í Linden í dag. AFP

Maðurinn sem eftirlýstur var vegna sprenginganna í New York og New Jersey hefur verið handtekinn í kjölfar skotbardaga við lögreglu. Var hann handtekinn í bænum Linden í New Jersey, að því er fram kom í máli lögreglu á sjónvarpsstöðinni NBC.

Maðurinn, sem nefnist Ahmad Khan Rahami, er 28 ára Bandaríkjamaður og fæddist í Afganistan.

Linden er skammt suðvestan við bæinn Elizabeth í New Jersey, heimabæ Rahami, þar sem fulltrúar alríkislögreglunnar FBI fundu og gerðu óvirkan fjölda sprengja sem komið hafði verið fyrir á lestarstöð.

Sjá ítarlega fréttaskýringu mbl.is: Margt á huldu um árásirnar

FBI hefur gert mikla leit að Rahami eftir sprengingarnar. AFP

Lýst var eftir Rahami vegna gruns um aðild að sprengingunum í Chelsea-hverfinu í New York, þar sem 29 manns særðust, og rörsprengjuárás við Jersey-ströndina, sem varð engum að tjóni.

Hann var handtekinn aðeins fjórum klukkustundum eftir að FBI hafði gefið út mynd af honum brúnhærðum og -skeggjuðum, þar sem hann var sagður „vopnaður og hættulegur“, í textaskilaboðum til þeirra milljóna manna sem búa í New York og nágrenni.

Uppfært 15.55:

Sjónvarpsupptökur CNN sýna Rahami þar sem hann var borinn á sjúkrabörum inn í sjúkrabíl eftir að hafa særst í skotbardaga við lögregluna. Hafði hann blóðugar sáraumbúðir á hægri handlegg, hristi höfuðið til hliðanna með augun opin og bringa hans var að hluta til undir teppi.

Tveir særðust auk Rahami í skotbardaganum. AFP

Uppfært 16.07:

Tveir lögreglufulltrúar urðu fyrir skoti og særðust í skotbardaganum. Þetta segir bæjarstjóri Elizabeth, Chris Bollwage, í samtali við fréttastofu CNN.

„Einn lögreglufulltrúi var skotinn í bringuna og annar í hendina. Þá varð Rahami einnig fyrir skotum,“ sagði Bollwage.