Framkvæmdastjóri Atlantshafsbandalagsins, Jens Stoltenberg, segir að áætlanir Evrópusambandsins um aukið varnarsamstarf eftir brotthvarf Breta úr ESB muni ekki draga úr gildi NATO.
Stoltenberg segir að það sé engin mótsögn í sterku varnarsamstarfi innan ESB og sterku varnarbandalagi NATO. Heldur muni bandalögin styðja hvort annað. Hann er staddur á fundi varnarmálaráðherra ESB-ríkjanna í höfuðborg Slóvakíu, Bratislava.
Hann segir mikilvægt að komið sé í veg fyrir endurtekningu en varnarmálaráðherra Bretlands, Michael Fallon, segir að Bretar muni áfram vera andsnúnir hugmyndinni um ESB-her og að hugmyndir ESB um að auka varnarstarf ríkjanna eftir Brexit muni draga úr gildi NATO.
Á fundinum er verið að ræða hugmyndir Frakka og Þjóðverja um meira varnarsamstarf og hvar hernaðarhöfuðstöðvar ESB eigi að vera eftir að samþykkt var nýverið að auka varnarsamstarfið.