Lögreglan á Bretlandseyjum hefur handtekið 78 ára gamlan karlmann vegna morðs á fjórtán ára gamalli skólastúlku fyrir 51 ári síðan.
Í frétt Sky-sjónvarpsstöðvarinnar segir að maðurinn sé nú yfirheyrður vegna gruns um að hafa myrt Elsie Frost árið 1965.
Frétt mbl.is: Rannsaka 50 ára gamalt morðmál
Elsie var stungin til bana árið 1965. Hún var þá á göngu í gegnum lestargöng í Wakefield á Englandi. Þegar lögreglan ákvað fyrir ári síðan að taka málið aftur til rannsóknar vegna nýrra vísbendinga kom fram að hún væri að leita upplýsinga um „slátrara eða starfsmann sláturhúss“ sem sást hjóla í námunda við þann stað þar sem lík hennar, klætt gulri peysu, rauðum stakk og mynstruðu pilsi, fannst.
Í viðtali við Sky-sjónvarpsstöðina segir lögreglumaðurinn Nick Wallen að frá því að málið var endurupptekið hafi lögreglunni borist fjöldi vísbendinga frá almenningi, m.a. nýjar upplýsingar um málið. Þessum vísbendingum hafi verið fylgt fast eftir. „Í kjölfarið höfum við nú handtekið 78 ára gamlan mann í Berkshire.“
Það var kona að viðra hundinn sinn sem gekk fram á lík Elsie snemma morguns. Í krufningarskýrslu kemur fram að hún hafi ekki verið beitt kynferðislegu ofbeldi. Málið var algjör ráðgáta þar sem engin augljós ástæða var fyrir árásinni.
Verkamaður sem bjó á svæðinu, hinn 33 ára Ian Bernard Spencer, var ákærður fyrir morðið á sínum tíma. Fallið var frá ákærunni skömmu síðar.