Stjórn Alþjóðabankans samþykkti samhljóða að velja Jim Yong Kim til að stýra bankanum áfram annað tímabilið sitt sem forseti bankans. Þetta tilkynnti bankinn núna í kvöld.
Kim var eini frambjóðandinn í kjörinu, en ferlið var gagnrýnt af starfsfólki bankans fyrir að skorta gegnsæi og að Bandaríkin hafi í raun stýrt því.
Kim er læknir að mennt og tók við sem forseti bankans af Robert Zoellick árið 2012. Kim var rektor Dartmouth háskólans í Bandaríkjunum en hann er fæddur í Suður-Kóreu 1959. Hann lærði læknisfræði í Harvard og stýrði áður HIV/AIDS deild Alþjóðaheilbrigðismálastofnunarinnar.
Kjör hans fyrir fjórum árum vakti talsverða athygli þar sem almennt hefur aðili úr fjármálageiranum verið valinn í þetta starf.