Að minnsta kosti 96 börn hafa látist og 223 særst í austurhluta Aleppo í Sýrlandi frá því á fimmtudag. Þetta kemur fram í tilkynningu frá aðstoðarframkvæmdastjóra UNICEF, Barnahjálpar Sameinuðu þjóðanna.
„Börnin í Aleppo eru föst í lifandi martröð,“ segir Justin Forsyth. „Það eru engin orð til að lýsa þeim þjáningum sem þau eru að upplifa.“
Heilbrigðiskerfið í austurhluta Aleppo er að hruni komið og aðeins 30 læknar að störfum. Búnaður og neyðarlyf til að hjálpa slösuðum eru að þrotum komin en slösuðum fjölgar sífellt.
Læknir á vettvangi greindi UNICEF frá því að börn í alvarlegri lífshættu væru oft skilin eftir til að deyja, vegna takmarkaðrar afkastagetu og skorts á sjúkragögnum.
„Ekkert réttlætir slíkar árásir á börn og algjöra lítilsvirðingu gagnvart mannslífinu. Þjáningin, og áfallið fyrir börnin, er án efa það versta sem við höfum séð.“
Á Facebook-síðu UNICEF á Íslandi má fylgjst með fregnum frá Sýrlandi. Þá er neyðarsöfnun samtakanna í fullum gangi og hafa þúsundir þegar lagt sitt af mörkum.