Sextán voru drepnir þegar vígamenn klæddir sjálfsmorðssprengjuvestum gerðu árásir á opinberar byggingar og svæði í írösku borginni Kirkuk.
Á sama tíma nálgast íraskar hersveitir borgina Mosúl, sem er á valdi hryðjuverkasamtakanna Ríkis íslams.
Árásir voru meðal annars gerðar á höfuðstöðvar lögreglunnar og herstöðvar en borgin er undir stjórn Kúrda. Í einni árásinni ruddust þrír sprengjumenn inn í orkuver íransks fyrirtækis, skammt frá borginni Dibis, um 40 kílómetra norðvestur af Kirkuk, og drápu 12 starfsmenn þess.
Enginn hefur lýst ábyrgð á árásinni á hendur sér en talið er að Ríki íslams hafi staðið á bak við hana.