Enn ein konan hefur nú stigið fram og sakað forsetaframbjóðandann Donald Trump um kynferðislegt áreiti. Hún segir að Trump hafi kysst sig og faðmað á góðgerðarsamkomu í Nevada án hennar samþykkis.
Í frétt CNN segir að Jessica Drake sé að minnsta kosti ellefta konan sem ásakar Trump um kynferðislega áreitni. Allar hafa þær stigið fram í kjölfarið á opinberun upptöku frá árinu 2005 þar sem Trump talar illa um konur og segist fara með þær eins og honum sýnist.
Drake er klámmyndaleikkona og leikstjóri. Hún sagði á blaðamannafundi í Los Angeles í gær að Trump hafi beðið sig um símanúmerið hennar og boðið henni til hótelherbergis síns kvöldið sem þau hittust árið 2006. Hún fór og tók með sér tvær vinkonur sínar þar sem hún vildi ekki fara ein á hans fund.