Fólk sem stundar skátastarf í æsku er við betri andlega heilsu en aðrir. Þetta kemur fram í Breskri rannsókn sem BBC greinir frá. Rannsóknir í Bretlandi á 10.000 einstaklingum um fimmtugt sýna að það eru 15% minni líkur á að þeir sem hafa stundað skátastarf þjáist af kvíða eða andlegri vanlíðan en hinir sem ekki hafa verið í skátunum.
Rannsakendur telja að ástæðan gæti verið sú að þjálfun í úthaldi og lausnamiðuðu starfi sem einkennir skátastarf hafi þessi langvinnu jákvæðu áhrif.
Rannsóknin sem kallast National Child Development Study var unnin á vegum háskólanna í Edinborg og Glasgow. Tölfræðigögn um ævi 10 þúsund einstaklinga sem fæddust í nóvember 1958 víðsvegar í Bretlandi voru rannsökuð. Fjórðungur þátttakenda hafði stundað skátastarf.
Rannsakendur segja niðurstöður benda til þess að verkefni og aðferðir sem hjálpa börnum og ungmennum að þróa með sér kunnáttu og færni til að treysta á eigin getu og hópvinnu, ásamt því að stunda útiveru, skili sér í bættu lífi og andlegri líðan fyrir lífstíð.
Það að stunda skátastarf geti hjálpað til við að byggja upp viðnámsþrótt gagnvart almennri streitu og álagi í lífinu eða eins og rannsakendur nefndu sem möguleika að skátastarf gæti aukið möguleika fólks á að ná lengra í lífinu svo það ætti síður á hættu að upplifa umrædda streitu.
Einn rannsakendanna, prófessor Chris Dibben frá Háskólanum í Edinborg sagði að niðurstöðurnar hefðu komið honum á óvart; að sjá að ávinningur skátastarfs sé sýnilegur svo mörgum árum síðar á lífsleiðinni.
„Við gerum ráð fyrir að sama meginregla gildi um skátastarf í dag svo miðað við þann mikla kostnað sem andleg veikindi kosta einstaklinga og þjóðfélagið allt ætti áherslan á sjálfboðastarf barna og ungmenna eins og boðið er upp á í skátunum að vera mjög æskilegt og eftirsóknarvert,“ segri Dibben.
Prófessor Richard Mitchell við Háskólann í Glasgow sagði að sami ávinningur væri ekki sýnilegur í öðru sjálfboðastarfi og nefndi hann kirkjustarf sem dæmi. „Skátarnir venjast því að lenda í óvæntum aðstæðum og við teljum að það sé jafnvel mergur málsins.“
Skátahreyfingin er vægst sagt ánægð með niðurstöðuna.
Rannsóknin birtist fyrst í tímaritinu The Journal of Epidemiology and Community Health.