Lykilorð forsætisráðherra Svíþjóðar og nokkurra annarra ráðherra eru meðal lykilorða sem hakkarar hafa komist yfir og er hægt að finna í gögnum sem sænska ríkissjónvarpið hefur komist yfir. Þá eru lykilorð fjölda einstaklinga sem tengjast flokkum landsins einnig í gögnunum. Samtals er um að ræða 10 milljónir lykilorða sem ríkissjónvarpið segir að séu í dreifingu á netinu.
Ríkissjónvarpið birti í dag upplýsingar um lykilorðin sem fyrrverandi „ofurhakkari“ fann á netinu og aðstoði ríkissjónvarpið að finna. Um er að ræða upplýsingar um tölvupóstföng og lykilorð fólks að þjónustunum LinkedIn, Dropbox, Yahoo og Biljettnu. Segir í frétt ríkissjónvarpsins að oft á tíðum noti fólk sama lykilorðið á fleiri en einum stað og því geti leki á einum aðgangi orsakað aðgengi hakkara að fleiri þjónustum.
Ríkissjónvarpið opnaði í dag gagnagrunn þar sem fólk gat flett upp tölvupóstfanginu sínu og athugað hvort það væri meðal þeirra 10 milljóna sænskra póstfanga sem höfðu ratað til hakkara og voru aðgengileg á netinu.
Meðal netfanga sem finna má í gögnunum er netfang Stefan Löfven, forsætisráðherra Svíþjóðar, Gustav Fridolin menntamálaráðherra, Morgan Johansson dómsmálaráðherra og Anders Ygeman innanríkisráðherra.