Hin sjö ára gamla Bana Alabed, sem hefur vakið athygli fjölmiðla og samfélagsmiðlanotenda fyrir lýsingar sínar á lífinu í austurhluta Aleppo á umsáturstímum á Twitter, er fundin heil á húfi, samkvæmt BBC.
Alabed hefur verið búsett í austurhluta Aleppo ásamt fjölskyldu sinni, en íbúar þar hafa lifað við umsátursástand undanfarið misseri. Undanfarnar vikur hefur sýrlenski stjórnarherinn staðið fyrir hörðum árásum á borgarhlutann sem hann reynir að ná á sitt vald úr höndum uppreisnarmanna.
Alabed hvarf af samfélagsmiðlum í gær eftir að sýrlenski stjórnarherinn tók yfir enn fleiri hverfi í austurhluta borgarinnar.
Frétt mbl.is: Leita stúlkunnar sem tísti frá Aleppo
Um 160.000 eru fylgjendur hennar á Twitter en bæði Alabed og móðir hennar, Fatemah, tjá sig þar og lýsa aðstæðum í stríðinu í Sýrlandi. Fjöldi fólks hefur lýst yfir áhyggjum af öryggi mæðgnanna.
Samkvæmt fregnum BBC eru mæðgurnar á ótilgreindum stað.
Fatemah tjáði sig á Twitter fyrir stundu: „Við höfum orðið fyrir árás. Við getum ekki farið neitt og hver mínúta er eins og dauðinn. Biðjið fyrir okkur. Bless.“
Under attack. Nowhere to go, every minute feels like death. Pray for us. Goodbye - Fatemah #Aleppo
— Bana Alabed (@AlabedBana) December 5, 2016