Forseti Filippseyja, Rodrigo Duterte, segir að hann hafi sjálfur drepið fólk sem var grunað um saknæmt athæfi þegar hann var borgarstjóri í Davao. „Í Davao var ég vanur að gera þetta sjálfur. Bara til að sýna ykkur strákar að ef ég get þetta hvers vegna getið þið það þá ekki,“ sagði Duterte í ræðu sem hann flutti á mánudagskvöldið fyrir kaupsýslumenn. Þar var hann að ræða baráttu sína gegn eiturlyfjasala í landinu en lögregla og aðrir hafa drepið þúsundir íbúa landsins frá því hann varð forseti 30. júní.
Að sögn Duterte var svipað í gangi þegar hann var borgarstjóri í Davao en hann stýrði borginni í tæplega 20 ár. Hann segist hafa ferðast um borgina á mótorhjóli ásamt fleirum þar sem hann leitaði uppi vandræði. „Ég var í fullri alvöru að reyna að lenda í átökum svo ég gæti drepið.“
Duterte segir að það komi ekki til greina að hætta aðgerðum gegn eiturlyfjasölum á Filippseyjum þrátt fyrir óskir Bandaríkjaforseta, Baracks Obama, og mannúðarsamtaka.
Mannréttindasamtök hafa sakað Duterte um að bera ábyrgð á aftökusveitum sem drápu yfir eitt þúsund manns sem voru grunaðir um glæpi. Hingað til hefur hann neitað að hafa vitað um drápin.