Zara Tindall, næstelsta barnabarn Elísabetar Bretlandsdrottningar, hefur misst fóstur. Barnsins var að vænta í heiminn í vor.
Tindall er dóttir Önnu prinsessu, systur Karls Bretaprins. Eiginmaður hennar heitir Mike Tindall.
Talsmaður Buckingham-hallar tilkynnti um fósturmissinn. Engar skýringar frekari skýringar voru gefnar aðrar en þær að Tindall væri ekki í lífshættu.
„Sá sorglegi atburður átti sér stað að Zara og Mike Tindall hafa misst barnið sitt. Á þessum erfiðu tímum biðjum við alla um að virða einkalíf þeirra,“ sagði talsmaðurinn, að því er fram kemur í frétt Sky-sjónvarpsstöðvarinnar.
Tindall á eina dóttur sem er orðin þriggja ára.