Noregur verður fyrsta landið í heiminum sem hættir FM-útsendingum útvarps, var þetta ákveðið í desember en ákvörðunin tók gildi í dag. Klukkan 11:11 að staðartíma í morgun hófst ferlið, fyrst í Nordland og svo smám saman eftir því sem sunnar dregur.
Norðmenn ætla að skipta yfir í svokallað DAB [Digital Audio Broadcasting] kerfi sem gerir það að verkum að útvarpstæki um fimm milljóna Norðmanna verða úrelt.
Stafræna kerfið býður upp á meiri gæði og kostar ekki nema lítinn hluta af því sem FM-kerfið kostaði, eða 12,5%.
Samkvæmt skoðanakönnum sem Dagbladet lét framkvæma í desember eru tæp 70% Norðmanna andsnúin þessum breytingum og þykir þeim hlutirnir breytast of hratt. Aðeins 17% stuðningur var við að leggja FM-útsendingar alfarið niður.
Við lok þessa árs verða ríkisstöðvar eingöngu aðgengilegar á DAB-rásum en aðrar stöðvar hafa fimm ár til að breyta sínum málum.
Þrátt fyrir að um 70% Norðmanna noti DAB-kerfið hafa gagnrýnendur sagt að of margir þurfi að ráðst í dýrar endurbætur á tækjum sínum en nýtt útvarp í bíl kostar um 4.000 norskar krónur (54.000 íslenskar krónur).
„Noregur er ekki tilbúinn. Það eru milljónir útvarpstækja sem munu ekki virka og einungis 25% bíla í Noregi ná DAB-kerfinu,“ sagði Svein Larsen, formaður sambands útvarpsstöðva í Noregi.
„En Noregur hefur tekið þessa ákvörðun. Vegna praktískra ástæðna og hagkvæmisins vegna er það of seint að snúa aftur núna.“