Í það minnsta 30 voru drepnir í óeirðum í Alcacuz-fangelsinu í Brasilíu en slagsmál brutust út á milli tveggja gengja í fangelsinu í gær. Átökin stóðu yfir í fjórtán klukkustundir. Fram kemur í frétt AFP-fréttaveitunnar að um blóðbað hafi verið að ræða, en einhverjir hinna myrtu voru hálshöggnir.
Öryggissveitir umkringdu fangelsið, en einhverjir fanganna voru sagðir vera vopnaðir. Öryggissveitirnar ruddust svo inn í fangelsið snemma í morgun. Fangelsið er yfirfullt en þar sitja nú 1.083 fangar þrátt fyrir að það hafi aðeins verið byggt fyrir 620 fanga.
Talið er að átökin hafi verið á milli stærsta eiturlyfjagengis Brasilíu, First Capital Command, og annars gengis sem er í bandalagi með þeirra helsta andstæðingi. Óeirðir eru algengar í yfirfullum fangelsum í Brasilíu, en fyrr í mánuðinum létu 60 lífið í sambærilegum átökum í öðru fangelsi þar í landi.
Í Brasilíu voru 622 þúsund manns fangar við lok árs 2014, en mannréttindahópar hafa oft kvartað yfir aðbúnaði og aðstæðum fanga.