Þjófur, sem þóttist vera viðskiptavinur, stal skartgripum sem metnir eru á 15 milljónir evra, sem svarar til 1,8 milljarða króna, í skartgripaverslun í Cannes í gær.
Að sögn frönsku lögreglunnar er þjófurinn talinn vera á fertugsaldri en hann kom inn í skartgripaverslun Harry Winston í gær og gekk út með skargripina skömmu síðar. Maðurinn, sem var með sólgleraugu, var álitinn viðskiptavinur af starfsfólki þangað til hann dró upp skammbyssu og eitthvað sem líktist handbyssu. Á öryggismyndavélum sést þjófurinn síðan ganga í rólegheitum frá versluninni án þess að hafa hleypt af skoti eða sært nokkurn í versluninni.
Borgarstjórinn í Cannes, David Lisnard, segir að ekkert hafi verið hægt að gera til þess að komast hjá ráninu og biðlar til stjórnvalda í Frakklandi að heimila notkun augnskanna og fingrafarahugbúnaðar til að koma í veg fyrir glæpi sem þessa.