Breska þingið samþykkir Brexit

Theresa May, forsætisráðherra Bretlands, yfirgefur skrifstofu sína og heldur til …
Theresa May, forsætisráðherra Bretlands, yfirgefur skrifstofu sína og heldur til þinghússins í dag. AFP

Mikill meirihluti neðri deildar breska þingsins samþykkti í kvöld lagafrumvarp ríkisstjórnar Theresu May, forsætisráðherra Bretlands, þar sem stjórninni er veitt heimild til þess að virkja 50. grein Lissabon-sáttmála Evrópusambandsins og hefja þar með formlegt úrsagnarferli landsins úr sambandinu. Frá þessu er greint á fréttavef breska dagblaðsins Daily Telegraph.

Fram kemur í fréttinni að 498 þingmenn hafi samþykkt að veita ríkisstjórninni heimild til þess að hefja úrsagnarferlið formlega en í neðri deild breska þingsins eiga í heildina sæti 650 þingmenn. Samtals greiddu 114 þingmenn atkvæði gegn lagafrumvarpinu. Tekist hefur verið á um málið í þinginu undanfarna tvo daga en næst fer frumvarpið til lávarðadeildarinnar.

Frá neðri deild breska þingsins í dag.
Frá neðri deild breska þingsins í dag. AFP

Fyrir fram var búist við að frumvarpið yrði samþykkt með öruggum meirihluta en meiri óvissa er um örlög þess í lávarðadeildinni þar sem Íhaldsflokkurinn, flokkur May, hefur ekki meirihluta ólíkt neðri deildinni. Hins vegar telja flestir ólíklegt að lávarðadeildin stöðvi frumvarpið þó að hún gæti hins vegar tafið framgöngu þess töluvert og sett tímaáætlanir úr skorðum.

Meirihluti breskra kjósenda samþykkti í þjóðaratkvæðagreiðslu í lok júní síðasta sumar að Bretland skyldi segja skilið við Evrópusambandið. Ríkisstjórn landsins hefur síðan unnið að því að undirbúa viðræður við sambandið um útgönguna og er stefnt að því að þær hefjist formlega í lok mars og að Bretland verði formlega ekki lengur hluti þess árið 2019.

Breska þinghúsið í London, höfuðborg Bretlands.
Breska þinghúsið í London, höfuðborg Bretlands. AFP
mbl.is
Fleira áhugavert
Fleira áhugavert