Mótmæltu fóstureyðingum í 45 ríkjum

Andstæðingar fóstureyðinga stóðu fyrir mótmælum á meira en 200 stöðum í 45 ríkjum Bandaríkjanna í dag. Mótmælin voru haldin við heilsuverndarstöðvar Planned Parenthood, sem dreifa getnaðarvörnum og framkvæma fóstureyðingar, en andstæðingar fóstureyðinga vilja að ríkið hætti fjárstuðningi við stöðvarnar.

„Við höfum meðbyrinn,“ sagði Eric Scheidler, framkvæmdastjóri Pro-Life aðgerðahópsins, í samtali við New York Times. „Við búumst við tugþúsundum stuðningsmanna því í dag ætlum við að senda þau skilaboð að við viljum að ríkisframlögum til Planned Parenthood verði hætt,“ hefur Reuters-fréttastofan eftir Monicu Miller, forstjóra samtakanna Citizens for a Pro-Life Society og einum skipuleggjenda mótmælanna.

Fjöldi stuðningsmanna fóstureyðinga kom saman við Thompson-miðstöðina í Chicago. AFP

Mótmælin voru haldin til að krefjast þess að fjárstuðningi við heilsugæslustöðvarnar verði hætt. Fjöldi stuðningsmanna fóstureyðinga hélt sín eigin mótmæli við 150 byggingar ríkisstofnana, heilsugæslustöðvar og í almenningsgörðum. Á sumum stöðum var fjöldi stuðningsmanna fóstureyðinga meiri en andstæðinganna.

Scheidler sagði forsetakosningarnar hafa verið algjöran vendipunkt í baráttu andstæðinga fóstureyðinga. „Andstæðingar fóstureyðinga eru lykilhópur kjósenda og stjórn Trumps hefur veitt því athygli.“

Stuðningsmenn Planned Parenthood veifuðu bleikum skiltum þar sem samstöðu við heilsugæslustöðvarnar var lýst yfir. „Stuðningsmenn Planned Parenthood og aðgerðasinnar sýna að þeir neita að láta ógna sér og að þeir munu ekki gefa sig,“ sagði í yfirlýsingu frá Kelley Robinson, einum yfirmanna Planned Parenthood.

Andstæðingur fóstureyðinga mótmælir við Planned Parenthood-heilsugæslustöð í Colorado Springs. AFP

• Blogga um frétt