Tæknifyrirtæki verða að gerast öflugri í að tækla „falskar fréttir“, segir Tim Cook, forstjóri Apple. „Við þurfum öll að skapa tæki til að draga úr magni falskra frétta,“ sagði hann í samtali við Daily Telegraph.
„Við þurfum að reyna að gera þetta án þess að traðka á tjáningarfrelsinu og fjömiðlafrelsinu, en við verðum líka að aðstoða lesandann.“
„Mörg okkar eru bara að takast á við kvartanir núna og hafa ekki fundið út hvað er hægt að gera.“
Cook átti fund með Theresu May, forsætisráðherra Bretlands, á fimmtudag. Hann sagði í viðtalinu að stjórnvöld ættu einnig að láta til sín taka og upplýsa almenning.
„Okkur vantar nútímaútgáfu af almannahagstilkynningunum (e. public-service announcement). Það má gera það fljótt, ef vilji er til,“ sagði hann.
„Við erum að fara í gegnum tímabil þar sem það fólk sem er að sigra er því miður það sem ver tíma sínum við að fá flesta smelli, ekki segja mestan sannleika. Það er á suman hátt að drepa huga fólks.“
„Falskar fréttir“ (e. fake news) eru fréttir skáldaðar í hagsmunaskyni. Þær komust í umræðuna á meðan kosningabaráttan stóð yfir fyrir forsetakosningarnar vestanhafs en Facebook er meðal þeirra fyrirtækja sem hafa verið gagnrýnd hvað harðlegast fyrir að beita sér ekki af afli gegn fyrirbærinu.