Pólitískur andstæðingur Duterte ákærður

Leila de Lima.
Leila de Lima. AFP

Saksóknari á Filippseyjum hefur ákært þarlendan þingmann fyrir að hafa þegið fé frá eiturlyfjabarónum þar í landi. Þingkonan, Leila de Lima, er þekkt fyrir að vera mikill andstæðingur stríðsins gegn fíkniefnum sem geisar á Filippseyjum.

Rodrigo Duterte tók við embætti forseta síðasta sumar og hét hann því að útrýma fíkniefnum úr landinu. Síðan þá hafa meira en 7.000 manns verið drepnir í blóðugum átökum.

Lima hefur neitað þessum ásökunum og segir augljóst að þær séu settar fram af pólitískum ástæðum.

„Ef ég þarf að tapa frelsinu til að standa í hárinu á þeirri slátrun sem stjórn Duterte stendur fyrir, þá verður að hafa það,“ sagði Lima í yfirlýsingu vegna málsins.

Gagnrýnendur segja að Duterte hvetji lögreglumenn og aðra til að skjóta alla þá sem grunaðir eru um eiturlyfjaneyslu eða sölu.

Sjálfur hefur Duterte varið aðgerðir sínar og segir að lögregluþjónar eigi eingöngu að skjóta þegar þeim er ógnað.

Frétt BBC

mbl.is
Fleira áhugavert
Fleira áhugavert