Tvær konur verða ákærðar fyrir morðið á Kim Jong-Nam sem var tekinn af lífi með banvænu taugagasi á alþjóðaflugvellinum í Kuala Lumpur nýverið.
Mohamed Apandi Ali, ríkissaksóknari Malasíu, greindi frá þessu í dag en tvær vikur eru síðan hálfbróðir leiðtoga Norður-Kóreu var myrtur á flugvellinum. Konurnar, önnur víetnömsk en hin indónesísk, verða leiddar fyrir dómara á morgun þar sem þær verða ákærðar fyrir morð. Verði þær fundnar sekar eiga þær yfir höfði sér dauðarefsingu.
Á myndskeiði úr öryggismyndavélum sjást konurnar tvær setja eitthvað í andlit Kims í brottfararsal flugvallarins. Hann lést skömmu síðar á leið á flugvöllinn. Konurnar halda því fram að þær hafi verið að taka þátt í hrekk sem væri verið að taka upp á myndskeið.
Siti Aisyah, 25 ára frá Indónesíu, segir að hún hafi fengið greiddar 400 malasísk ringgit, sem samsvarar tæpum 10.000 krónum, fyrir sinn hlut í hrekknum. Hún hafi haldið að vökvinn væri barnaolía.
Kim Jong-nam var drepinn með mjög eitruðu taugagasi, VX, en samkvæmt Vísindavef Háskóla Íslands er það öflugasta efnavopn sem vitað er með vissu að framleitt hafi verið. Sameinuðu þjóðirnar skilgreina VX sem gjöreyðingarvopn.
Doan Thi Huong, 28 ára frá Víetnam, hefur einnig sagt að hún hafi verið göbbuð til að taka þátt í morðinu á Kim en hún hafi talið að um hrekk væri að ræða. Hrekkurinn væri hluti af grínmyndskeiði.
Saksóknari hefur ekki minnst á hvort norðurkóreski maðurinn sem einnig var handtekinn í tengslum við morðið, Ri Jong-Chol, sem er 46 ára gamall, verði ákærður.