Að minnsta kosti tveir eru særðir eftir skotárás í franska bænum Grasse í dag. 17 ára drengur hefur verið handtekinn í tengslum við málið en annar ungur maður er sagðu á flótta undan lögreglu.
Greint er frá þessu á vef BBC.
Þar kemur fram að vopnaður maður hafi ráðist á Tocqueville skólann í morgun. Hryðjuverkalögregla er á staðnum og þá hafa stjórnvöld varað íbúa á svæðinu við árásinni í gegnum sérstakt smáforrit. Samkvæmt frétt AFP hefur öllum skólum á 40 kílómetra svæði vestan við Nice verið lokað vegna árásarinnar.
AFP vitnar í yfirlýsingu frá bæjaryfirvöldum í Grasse þar sem fram kemur að tveir nemendur við skólann hefðu hafið skothríð á yfirkennara skólans sem særðist. Reuters heldur því fram að sá handtekni sé 17 ára gamall. Hann er ekki þekktur innan lögreglunnar á svæðinu en var vopnaður riffli, tveimur skammbyssum og tveimur handsprengjum þegar hann var handtekinn.
Þá er vitnað í bæjarstjóra Grasse sem segir að talið sé að skotmark árásarmannana hafi verið bekkjarfélagi þeirra.
Neyðarlög hafa verið í gildi í Frakklandi síðan að hryðjuverkaárásir voru gerðar í París í nóvember 2015 en þá voru 130 manns drepnir af hryðjuverkamönnum Ríkis íslams.
Grasse er í Suður-Frakklandi, í um 43 kílómetra fjarlægð frá Nice.