Gates enn þá ríkastur en Trump hrapar

Bill Gates, stofnandi Microsoft, er enn eitt árið ríkasti maður heims að mati Forbes-tímaritsins. Donald Trump Bandaríkjaforseti hrapaði hins vegar niður um rúm 200 sæti á lista Forbes yfir ríkustu milljarðamæringana.

Auður Gates er metinn á um 86 milljarða Bandaríkjadala og er þetta fjórða árið í röð sem hann vermir efsta sætið á lista Forbes.

Í öðru sæti er fjárfestirinn Warren Buffet, sem er metinn á 75,6 milljarða dollara. Bandarískir  karlmenn, sem margir hverjir starfa innan tæknigeirans, eru fjölmennir á topp tíu lista Forbes, en auk þeirra Gates er þar að finna í þriðja sæti Jeff Bezos, stofnanda Amazon, Mark Zuckerberg, stofnanda Facebook, í því fimmta og Larry Ellison, sem stofnaði Oracle, í því sjöunda.

Trump hrapar hins vegar niður um 220 sæti og er nú í 544. sæti. Forbes metur hann að þessu sinni á 3,5 milljarða dollara. Tímaritið eignar lægð á fasteignamarkaði Manhattan fall Trumps, en stór hluti eigna forsetans er bundinn steinsteypu á því svæði.

„40% af auði Donald Trumps eru bundin í Trump-turninum og átta öðrum byggingum sem eru í innan við mílu fjarlægð,“ segir í umfjöllun Forbes. „Undanfarið hefur hverfið átt í basli (hlutfallslega séð).“

Milljarðamæringum fjölgaði þá um 13% frá síðasta ári og eru þeir nú 2.043 talsins. Er þetta mesta fjölgun í auðmannahópnum sem orðið hefur á einu ári frá því að Forbes birti auðmannalistann fyrst fyrir 31 ári.

Flestir milljarðamæringanna eru bandarískir eða 565 þeirra og þykir það vera til merkis um þá hækkun sem hefur verið á bandarískum hlutabréfamörkuðum frá því að Trump var kjörinn.

Annar stærsti hópur milljarðamæringa er þá kínverskur, eða 319, og þá á Þýskaland 114 auðmenn í þeim flokki.

Meðal annarra á topp tíu listanum voru Amancio Ortega, eigandi tískuverslanakeðjunnar Zöru, sem var í fjórða sæti, mexíkóski fjarskiptamógúllinn Carlos Slim var í sjötta sæti, bræðurnir Charles og David Koch voru í áttunda og níunda sæti og Michael Bloomberg, fyrrverandi borgarstjóri New York, í því tíunda.

• Blogga um frétt