Tuttugu menntaskólanemar létust er tré féll ofan á þá þar sem þeir voru að synda í á í óveðri í Gana. Slysið átti sér stað síðdegis í gær. Hópurinn var að synda við Kintampo-fossana sem er vinsæll ferðamannastaður í Brong-Ahafo.
Talsmaður slökkviliðsins segir að óveður hafi orðið til þess að tré rifnuðu upp með rótum og féllu ofan í ána þar sem táningarnir voru að synda.
Átján létust á staðnum en tveir létust á sjúkrahúsi. Ellefu til viðbótar þurftu á læknishjálp að halda eftir slysið, þeirra á meðal starfsmaður skólans sem var með í för.