Lögreglan á Ítalíu handtók eftirlýstan mafíósa nýverið sem var sakfelldur árið 2009 fyrir morð á sex mönnum í borginni Duisburg í Þýskalandi árið 2007. Hinn 45 ára gamli Santo Vottari var ekki viðstaddur dómsuppkvaðninguna og hefur verið í felum síðustu tíu árin.
Lögreglan handsamaði hann í íbúð í borginni Benestare á Suður-Ítalíu. Vottari hafði komið sér fyrir í þröngu herbergi í risi íbúðarinnar. Rýmið var það lítið að hann hefði ekki getað dvalið þar lengur en í nokkrar klukkustundir.
Vottari er sagður hafa verið einn af höfuðpaurum Ndrangheta-glæpasamtakanna sem eru ein þau alræmdustu á Ítalíu. Hann hlaut 10 ára og átta mánaða fangelsisdóm en auk hans voru 30 aðrir glæpamenn dæmdir til fangelsisvistar fyrir morðin í Duisburg. Mennirnir sex sem voru myrtir voru allir skotnir í höfuðið. Þeir voru milli tvítugs og þrítugs. Ástæðan fyrir morðunum voru átök á milli glæpasamtaka í borginni San Luca á Ítalíu.
Marco Minniti, innanríkisráðherra Ítalíu, lofaði framgöngu lögreglunnar en í íbúðinni voru hvorki meira né minna en fjögur vel falin leynirými.
Ndrangheta-samtökin eru þekkt fyrir vægðarleysi en talið er að umsvif þeirra séu nú meiri en sikileysku mafíunnar og Camorra-samtakanna í Napólí. Þau eru helsti innflytjandi og heildsali kókaíns sem framleitt er í Suður-Ameríku og smyglað til Evrópu.